19 avril 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
Bràvis ami, bèn lou bon-jour en tóuti e sigués li bèn-vengu dins nòstis Ermas. « Dès qu’en France le souvenir de l’Occupation et, plus largement, celui de la Seconde Guerre mondiale est en jeu, s’affiche la volonté de lutter contre l’oubli pour exorciser un passé ‘’qui ne passe pas’’ ». Perdounas-me de coumença la crounico de galis en franchimandejant. Aquéu prepaus vèn de Jan-Pèire Rioux que l’escriguè dins la revisto Inflexions en 2010. Es pèr acò qu’aquesto semano anan parla dóu devé de memòri, uno noucioun que nasquè tre la segoundo guerro moundialo acabado. D’efèt, me siéu pausa la questioun : de que fau pensa dóu devé de memòri dins nosto vido felibrenco ? De que represènto en fin finalo aquéu devé ? Es uno evidènci que pèr ço que relèvo de la guerro, me permetrié pas de me pausa la questioun, acò vai soulet. D’un biais generau e pèr quau que siegue, lou devé de memòri se resumo essencialamen à trasmetre i jouine la memòri e li valour de la Republico e d’ounoura tóuti aquéli qu’aparèron la Patrìo e ai ! las que ié leissèron sa vido e la de si proche. Aquest travai de memòri s’iscriéu au cor de l’aprendissage civi di generacioun endevenidouiro. Acò dins la toco de farga lou ciéutadinage. Es tout-parié pèr nosto vido d’aparaire de la lengo. Es necite de preserva l’eiretage e de trasmetre, qu’acò permet de pas reproudurre li deco d’à passa tèms. De que disès ? Acò marcho pas forço ? Verai, li memòri soun seleitivo e de cop que i’a, soun un brigoun courteto. Ame miéus de n’en pas dire mai sus aquéu sujèt. Pamens, se durben, vole dire s’alargan lou sèns dóu group nouminau « devé de memòri », lou poudrian resumi à ‘no óubligacioun mouralo que councerno tóuti li persouno que s’engajon pèr une causo. Verai que sian raramen, quàsi jamai li premié – li primadié – à durbi la rego. Adounc sian sèmpre devènt au respèt dóu mounde que li fau pas óublida e que lou faguèron avans nautre. Dóu cop, emai lou devé de memòri s’interessèsse i causo grèvo, acò i’empacho pas d’agacha tambèn li bèu moumen que soun à la sousto di souveni. E lou devé de memòri baio d’óucasioun de viéure de moumen de joio. Dins noste cas, lou devé de memòri rejoun lou proublèmo de la verita e la questioun de l’identita que se farguè à proupourcioun dóu debana dóu tèms. Aqui avèn durbi lou bahut de Pandoro tant l’identita es uno questioun impourtanto e que n’en poudrian parla pendènt d’ouro de tèms. Disen simplamen qu’un cop alarga, aquéu grand mot, « l’identita », rènd comte de la pèrdo de l’image qu’avian de nautre e dóu meme cop de l’envejo naturalo de retrouba uno fisanço despareigudo. Poudèn dire que fissa lou sabé es un mejan de requisto pèr pas leissa d’aprouchamen e d’ineisatitudo s’enfusa dins li souveni pèr fin de trasmetre la verita istourico, autant qu’es poussible de lou faire. Acò dins la toco pèr li cercaire de touto meno d’emplega de detai fisable de l’istòri pèr miéus rèndre comte di fa istouri. D’un autre las, aquéli qu’ensignon poudran mièus faire soun travai d’aprendissage pèr lis aprenènt. Verai, sian-ti segur de saupre la verita di chapitre de nosto istòri ? La couvido pèr eisèmple, de que se faudra rapela estènt que se diguè tout e lou countràri ? Basto, pèr ço que nous interèsso, sabèn tóuto vo gaire se n’en manco que i’a toujour uno part de mite e de fatorgo que s’escound dins l’istòri. Lou fau saupre e n’èstre counsciènt. En mai d’acò quand un escrivan escriéu si memòri e si souveni, poudèn èstre segur que i’a quàuquis incertitudo que s’enfuson. Acò vèn de la mecanico de la memòri individualo que, de bèlli fes, jogo de tour, encaro mai quand sian lou sèti d’ipernesìo autoubiografico, uno meno de patoulougìo, que se carateriso pèr uno capacita de se souveni ‘mé forço precisioun di detai liga à la vido. Pamens, de cop que i’a, aquelo carateristico mesclo li souveni. Alor mèfi ! Es tout parié pèr la memòri couleitivo que pòu agi coume un pouisoun pèr establi la verita istourico. Mèfi ! tambèn de pas leissa lou devé de memòri toumba pas dins lou coumun, la banalita. Ié fau baia de coulour, de relèu, d’emoucioun e i’apoundre la jouinesso qu’un jour, à soun tour, aura de trasmetre. Lou role dóu devé de memòri va de dela de se ramenta li causo e se fau mesfisa que reviha ùni d’aquéli causo noun s’endevenguèsse em’un chanjamen de coumpourtamen indesirable. Acò pòu arriba estènt que de cop que i’a l’istóri es mal-eisado d’entèndre e vèn poussible d’óusserva de marrìdi reacioun. Pamens, l’istòri la fau counèisse e pèr acò faire la fau entèndre meme dins ço que desagrado. De tout biais, lou debat demoro de-longo e trespasso l’istòri. Soulide.
Aro la crounico es acabado, vous doune rendès-vous la semano venènto. D’eici aqui, sigués fièr e gaiard. Vous brassège amistousamen. Brave mounde adissias !
Felip
